19-я гвардзе́йская Мікала́ева-Будапе́шцкая чырванасцяжная о́рдэна Суво́рава асобная механізаваная брыгада — адно з найбуйнейшых падраздзяленняў Узброеных Сіл Рэспублікі Беларусь.

Гісторыя

Падчас Другой сусветнай вайны 12 верасня 1941 года ў Свярдлоўскай вобласці РСФСР была сфарміравана 363-я стралковая дывізія. За ўдзел у сакавіку 1942 года ў разгроме нямецкіх войскаў пад Масквой яна была ўдастоена звання гвардзейскай.

23 кастрычніка 1942 года на базе 22-й гвардзейскай стралковай дывізіі ў горадзе Маршанску Тамбоўскай вобласці РСФРС быў сфармаваны 2-і гвардзейскі механізаваны корпус.

28 сакавіка 1944 года за ўдзел у вызваленні горада Мікалаева (УССР) гэтаму корпусу было прысвоена ганаровае найменне «Мікалаеўскі», а 5 красавіка 1945 года пасля ўзяцця горада Будапешта ён стаў яшчэ і Будапешцкім.

24 красавіка 1945 года корпус быў узнагароджаны ордэнам Чырвонага Сцяга, у тым жа месяцы — ордэнам Суворава II ступені. У ходзе баёў за гады Вялікай Айчыннай вайны з ліку ваеннаслужачых гвардзейскага злучэння Залатой Зоркай Героя Савецкага Саюза былі ўзнагароджаны 29 чалавек і больш за 140 тысяч ваеннаслужачых — ордэнамі і медалямі.

Пасля вайны У чэрвені 1945 года 2-і гвардзейскі механізаваны корпус быў ператвораны ў 2-ю гвардзейскую механізаваную дывізію. Яе перадыслакавалі з Чэхаславакіі ў Румынію, затым — у Венгрыю (г. Кечкемет).

У красавіку 1957 года 2-я гвардзейская механізаваная дывізія была ператворана ў 19-ю гвардзейскую Мікалаеўскага-Будапешцкую Чырванасцяжную, ордэна Суворава II ступені танкавую дывізію.

У 1990 годзе дывізію перадыслацыравалі ў н. п. Заслонава Лепельскага раёна Віцебскай вобласці.

У Рэспубліцы Беларусь З 1992 года дывізія знаходзіцца ў складзе Узброеных Сіл Рэспублікі Беларусь. У 1993 годзе яна была перафарміравана ў 19-ю гвардзейскую базу захоўвання ўзбраення і тэхнікі. А ў 2008 годзе — перайменаваная ў 19-ю гвардзейскую асобную механізаваную брыгаду.

Асабісты склад брыгады ўдзельнічаў ва ўсіх буйных вучэннях Узброеных Сіл Рэспублікі Беларусь, паказваючы пры гэтым толькі высокія вынікі.

Крыніцы

Літаратура https://vsr.mil.by/2016/09/10/dorogoj-muzhestva-i-slavy/

Катэгорыя:Брыгады Беларусі Катэгорыя:Гвардзейскія воінскія часці Беларусі Катэгорыя:З’явіліся ў 1941 годзе Катэгорыя:Заслонава