Валерый Анатольевіч Зінкевіч (нар. 23 сакавіка 1964, Салдус, Латвія) — беларускі ганчар, народны майстар, дудар і музыкант, мастак-аматар, разьбяр і рэканструктар гістарычнага ды этнаграфічнага посуду. Прадстаўнік традыцыйнай культуры Браслаўскага Паазер’я.
Біяграфія Нарадзіўся ў Латвіі. Ва ўзросце чатырох гадоў з бацькамі пераехаў у Браслаў Займаецца вывучэннем традыцыйнай культуры, гістарычнай рэканструкцыяй і рамяством.
Разам з жонкай, якая працуе ў сферы музейнай дзейнасці, удзельнічае ў развіцці аграэкатурызму, арганізацыі культурных мерапрыемстваў і фестываляў сярэднявечнай культуры ў Браслаўскім раёне.
Ганчарства і рэканструкцыя Асноўны кірунак творчасці — традыцыйнае ганчарства. Стварае посуд розных гістарычных перыядаў, у тым ліку рэканструкцыі старажытных форм. Праводзіць майстар-класы ў сваёй ганчарнай майстэрні ў Браславе, якую называе творчай прасторай.
Праз аграэкасядзібу праходзіць турыстычны маршрут «Кругосветка впечатлений», які ўключае культурна-пазнавальныя і прыродныя аб’екты Браслаўшчыны.
Музычная дзейнасць З’яўляецца дударом і іграе на традыцыйных беларускіх духавых інструментах. Займаецца таксама вырабам простых музычных інструментаў, у тым ліку акарын. У Глыбоцкім гісторыка-этнаграфічным музеі захоўваецца акарына яго працы.
Пленэры і конкурсы У 2022 годзе ўдзельнічаў у III Міжнародным пленэры народнага дэкаратыўна-прыкладнога мастацтва ў г.п. Копысь Аршанскага раёна. Падчас конкурсу ганчароў «Гліна спявае» быў узнагароджаны дыпломам лаўрэата I ступені ў намінацыі «Лепшы ганчарны посуд».
Падчас пленэра правёў майстар-клас «Тэхналогія аплятання ганчарнага посуду берасцянымі стужкамі». Арганізатарамі мерапрыемства выступалі Міністэрства культуры Рэспублікі Беларусь і шэраг культурных устаноў.
Узнагароды Народны майстар Рэспублікі Беларусь (2023) Лаўрэат I ступені конкурсу «Гліна спявае» (2022)
Крыніцы Воранаў В. Дудары з-над Дзвіны і з Паазер’я. — Мінск: Беларуская навука, 2001. «Гончар из Браслава Валерий Зинкевич создает посуду разных столетий» // videobel.by. «Конкурс ганчароў „Гліна спявае“» // НДУК «Браслаўскае раённае аб’яднанне музеяў», 29.09.2022.
Знешнія спасылкі Агросядзіба «Сядзіба ганчара»
Катэгорыя:Беларускія ганчары Катэгорыя:Беларускія дудары Катэгорыя:Народныя майстры Беларусі Катэгорыя:Беларускія музыканты Катэгорыя:Людзі з Браслава Катэгорыя:Нарадзіліся ў 1964 годзе