A Irmandade da Santa Cruz, tamén coñecida como Irmandade de Mulleres da Santa Cruz, é unha das oito confrarías que existen na Semana Santa de Viveiro. Ten a súa sede na igrexa de San Francisco, en Viveiro.
Historia A Ilustre e Venerable Confraría do Santísimo Rosario e a Venerable Orde Terceira Franciscana compartiron durante máis de dous séculos a organización dos desfiles procesionais da Semana Santa viveirense, ata que, a partir do ano 1944, se incorporou a Confraría do Santísimo Cristo da Piedade.
Ademais de achegar novos pasos, a Confraría da Piedade tamén realizou un importante esforzo publicitario, enviando carteis de anuncio por toda Galicia. No ano 1947 promoveu a primeira revista sobre a Semana Santa viveirense, titulada Pregón. Esta intensa publicidade serviu para atraer visitantes non só desde Galicia e Asturias, senón tamén viveirenses emigrados e persoas que escollían Viveiro como destino para as súas vacacións de Semana Santa.
Da Confraría da Piedade xurdiron diversas filiais. A primeira foi, no ano 1947, a Irmandade do Prendemento, seguida en 1951 pola Irmandade das Sete Palabras e, finalmente, en 1953, pola Irmandade da Santa Cruz, composta esta última unicamente por mulleres.
Pasos procesionais A Irmandade da Santa Cruz conta cos seguintes pasos procesionais:
María Santísima ao pé da Cruz (Venres Santo). Nosa Señora a Santísima Virxe da Esperanza (Sábado Santo).
Procesións Durante a Semana Santa de Viveiro, a Irmandade da Santa Cruz encárgase de sacar as seguintes procesións:
Procesión da Paixón (Venres Santo). Procesión da Esperanza da Resurrección (Sábado Santo).
Estandarte O estandarte da Irmandade da Santa Cruz foi confeccionado polas monxas Concepcionistas de Viveiro e data do ano 1953. O seu tecido é de veludo granate, con grandes bordados en fío dourado. O motivo central aparece enmarcado por unha orla vexetal, na que se dispón, sobre unha base rochosa, a Santa Cruz coa Saba Santa pendurada dos seus brazos. Ao seu redor, diferentes liñas radiais imitan escintileos.
Baixo o emblema principal sitúanse os símbolos da Paixón de Cristo: os cravos, rodeados pola coroa de espiñas. No reverso do estandarte aparece bordada igualmente en fío dourado a inscrición «Irmandade da Santa Cruz», así como a data de confección en números romanos.
Notas
Véxase tamén
Outros artigos Semana Santa de Viveiro Historia da Semana Santa de Viveiro Venerable Orde Terceira Franciscana Ilustre e Venerable Confraría do Santísimo Rosario Confraría do Santísimo Cristo da Piedade Irmandade do Prendemento Irmandade das Sete Palabras Confraría do Nazareno dos de Fóra Confraría da Misericordia
Categoría:Semana Santa de Viveiro Categoría:Artigos de Galicia sen imaxes