Гулливеровы вандровкы, Gulliver's Travels — фантастичный роман у формѣ подорожных записок од писателя Джонатана Свифта, написаный яко синтеза пародии на авантурны перипетии и сатиры на людску сполочность, котра выростать до антиутопии, кладучой под сомнѣв модерну рационалность, цивилизацию и представы о неминучом покроку и найвысшом поставлѣню чоловѣка в природѣ.
Гулливеровы вандровкы поважують за нарожный камѣнь английской литературы.Cregan-Reid, Vybarr.
Поява романа Гулливеровы вандровкы автор зачав писати еще за свого побыту в Лондонѣ од року 1714.Macura, Vladimír a kolektiv (eds.) В тых роках ториовска партия стратила моц, а з тым и Свифт утратив свой редакторскый пост в «The Examiner»-у. Опозиция ку новой владѣ вывинула ся в остру сатиру на практикы министерского председы Р. Волпола уж в первой части романа. Але минуло майже 12 рокы, покы 28. октобра 1726 книга увидѣла свѣтло свѣта в выдавательствѣ Бенджамина Мотта. Популарность книгы у читателя была невѣроятна: за даколько мѣсяци мусѣли книгу перевыдавати три раз.
Книга ся перевыдавать и доднесь. Интересно, же многы линии сюжета назначують реалны подѣи, котры Свифт зажив в роках 1710–1714 в Лондонѣ, в часѣ интенсивных политичных баламут.The Biography.com website.
Штруктура и обсяг Оригинална назва романа была: Вандровкы до даколькох оддаленых краин свѣта, в четырьох частях. Написав Лемюел Гулливер, спочатку шифный дохтор, а пак капитан даколькых шиф. Четыри части мають нееднаке число капитол (8, 8, 11, 12), а им передпослане вступне слово фиктивного выдавателя Симпсона и допис «автора» — капитана Лемюела Гулливера тому выдавательови. «Правдивость» посилена доданыма мапами, портретом самого Гулливера, и формов росповѣди од 1. особы.
В первой части (Путованя до Лилипутии) Гулливер ся очутить межи карликами. Свифт рисуе образ живота придворных и лендлордох яко ничомных, спростых и глупых карликох, высоко собѣ несучых, же на них ся держить земля. Они суть маломыселны, свой час перебывають в пустых дебатох, политичных рвачкох, и мають смѣшны обычаи, напримѣр суть подѣлены на двѣ партии (натяк на ториовцьох и виговцьох): первы ходять на высокых запятках, а другы на низкых, а на высокы посты дають тых, што суть добры балансеры на штрангу.
В другой части (Путованя до Бробдингнагу), наопак, Гулливер найде ся межи великодушныма и простыма гигантами, и яко дробное чоловѣча, ставать ся бавков их краля. Краль го просить змальовати, як то вызерать в краинѣ, одкаль приходить, а Гулливер зачне кральови выхваляти успѣхы людской цивилизации, на што тот, шокованый, му одповѣсть, же з того, што чув, не може иншак судити лем так, же краяне Гулливеровы суть найшкодливша и найгнуснѣйша мушкарня, яка з допущѣня Божого плазить ся по земли.
Третя часть (Путованя до Лапуты, Балнибарби, Глубдубдрибу, Луггнаггу и Японии) не мать композично и замѣрно нич обще з попередныма частями. Не мать ани едину филозофичну централну ось, але складать ся з окремых пригод и зажиткох. Гулливер трафить на лѣтаючый остров Лапута, котрый бомбардуе положены под ним землѣ камѣньом. Ту ся стрѣтить з догматиками и доктринерами, котры суть маниакално ограничены своима теориями и нич не знають о животѣ за тыма границями. Лапута лѣтать над другым островом, Балнибарби, господарско и културно заосталым и закрывать од него сонце и дождь (натяк на Англию и Ирландию). На Глубдубдрибу, островѣ чародѣйох, доставать можность говорити з великыма особами минулости и дознавать ся, як годна быти перекручена история. На островѣ Луггнагг стрѣчать ся з безсмертныма гуманоидами Струлдбругами, котры суть зостарнуты, незадоволены и нещастны зо своей безсмертности. В конци трафлять до реалной Японии, котра в тых добах была про европаны непозната и закрыта земля.
Четверта часть (Путованя до краины Гвайгнимох) рисуе утопичну благобытну краину благородных и розумных коньох Гвайгнимох, котры знають говорити, мають добрѣ организоване сполоченство без лжи, крадежи, пияцтва, пыхы, а в газдовствѣ им служать Ягуове, брутална, лачна, брудна и дегенерована гуманоидна раса, одомашнена Гвайгнимами. Гулливер научить ся язык Гвайгнимох, не хоче одыйти з их краины, але они го поважують за интелигентного Ягуа и депортують, жебы им не збунтовав иншых Ягуох. Гулливер мусить вернути ся домов межи люде, але противить ся му людске сполоченство, обстарать си двох коней и одбывать з нима свой час в бесѣдах на их языкови.
Шацованя Свого часу Волтер быв в захватѣ од романа и учив ся од Свифта.Литературна енциклопедия ФЕБ Гулливеровы пригоды в наш час уж не суть прииманы як остра сатира на актуалный стан англицкого сполоченства 18. ст., але як сатира, яка бичуе слабости людства. В сучасности ширшый круг читательох цѣнить тоту книгу як авантурный роман, подорожны пригоды, вынаходливу фантастику.
Жерела и одказы Swift, Jonathan: Gulliverovy cesty. // Vladimír Macura a kolektiv (eds.) Slovník světových literárních děl. 2/M-ž. Vydání druhé. Praha, Odeon, 1989. Ss. 287-288. Vybarr Cregan-Reid: Gulliver’s Travels, novel by Swift. //Encyclopaedia Britannica. Jonathan Swift. //The Biography.com website. Джонатан Свифт. //Литературна енциклопедия ФЕБ.
Референции
Катеґорія:Англицка литература