Едва́р Мане́ Édouard Manet ; *23. януар 1832, Париж – †30. апрѣль 1883, Париж) — французскый модернистичный малярь, рытовник, ключова постава добы перехода од реализма ку импресионизму.Courthion, PierreКалмыков В. А., Стародубова В. В.Henri Perruchot
Биография Походив з родины высокого державного урядника, а мав два молодшы браты. Отець му сочив карьеру урядника и дав го до добрых школ, але нияка наука му не йшла, окрем рисованя. В родинѣ професия маляря ся поважовала за недостойну, и отець му не дав дозвол учити ся на маляря. Тогды выбрав собѣ военно-морске училище, але провалив вступны испыты, зато в децембрѣ 1848 пошов корабльовым хлопцьом на поврочну плавбу до Бразилии. По вернутю до Франции в юну 1849 года другый раз ся провалив на военно-морском испытѣ, и тогды родители наконець полѣвили упорному рѣшѣню сына стати ся малярьом.
В роках 1850–1856 ся учив в штудии академичного маляря Тома Кутюра. Хоть му ся академична школа не любила, у Кутюра ся добрѣ научив рисунок и малярскы техникы. По шести роках лишив академичну школу и створив властну штудию.
В року 1850 до родины Мане прияли молоду учительку клавира Зузану Леенгофову. Она мала тайный роман з Едваром, и в року 1852 им ся родив сын, Леон Едвар Коелла, котрого Зузана представила як свого брата. Правду скрывав од отця и лем по его смерти в року 1863 ся оженив зоз Зузанов.
Од року 1877 мав здоровелны проблемы. Тяжко му было ся рухати, а од недостатку руху ся наконець вывинула гангрена. Пару днѣ перед смертьов му была ампутована нога, але то не помогло. Погребеный на парижском теметовѣ Пасси.
Творба В Парижу каждого ци каждого другого року была престижна выставка под назвов Салон, на котру порота выберала образы, мальованы в традичном академичном штилу. Але сюжетами Мане были сцены, взяты з каждоденного живота. Поступно ся вывольнять од темного и глухого «академичного» тона, але звекшать контрасты, часто малюе на пленерѣ, на улицях, поетизуе обычайны малозначны ситуации, котры видить довкола себе.
Мане первый раз в року 1859 попробовав подати на Салон Пияка абсинту, але не прияли го, бо то быв «недостойный» сюжет. В року 1861 стало ся, же од него Салон прияв два образы, Портрет родительох, написаный близко ку традичному штилу, и Испанского спѣвака (гитаристу), котрого ай похвалив Теофил Готье в пресѣ.
Але наступны Салоны одвергли его образы Фрыштик на травѣ (1863) и Олимпия (1865), котры были признаны неялыма, епатажныма и шкандалныма. В тых образах Мане иронизуе над подобныма класичныма сюжетами, бо зобразив выразно сучасных людей, в сучасном облечѣню в комбинации з голым тѣлом.
Мане выставляв свои роботы переважно на окремых выставках въедно з иншыма «револучныма» малярями, котры одмѣтовали академичне официалне малярство. Его выбор сюжетох вплынув на розвой умѣня наступных генераций. Его позорность ку сучасным городскым темам, котры он представляв з прямостьов, силно ся одличовали од штандартох Салона, котры ся переважно выстерѣгали «суровых реалий каждоденности». Смѣлый и твердый приступ Мане ку свому малярству зыскав му ключову позицию в истории сучасного умѣня.
Жерела и одказы
Референции
Катеґорія:Маляре Катеґорія:Модернизм Катеґорія:Персоналии 19. стороча