Інтелектуа́лна інвалі́дность, пораз мента́лна інвалі́дность (застарілый термін мента́лна ретарда́ція) є общый невророзвойовый розлад, котроє ся характеризує читавым нарушеньом інтелектуалных и адаптивных функцій, котроє ся провказує з дітинськых рокув. Діти з інтелектуалныма інвалідностями типово мавут квоцієнт інтелекта (IQ) меншый уд 70 тай дефіціты у маймало двох адаптивных реакцій, котрі вливавут на кажджоденный жывут. Подля DSM-5, інтелектуалні функції обсягувут мысленя, рішеня проблем, планованя, абстрактноє думаня, суженя, академічноє учіня тай учіня на скушеностьох. Дефіцит такых функцій має быти пудтверженый клінічнов оцінков и індивідуалным стандартным тестованьом IQ. Недостаточность адаптивных функцій часто усложнят вадь пудрыват самостуйность челядника и його можность исповняти соціалні обовязкы.

Інтелектуалні інвалідності ся ділят на синдромні тай несиндромні: у трафунку синдромных інтелектуалных інвалідностий, інтелектуална недостаточность ся капчат на другі медичні тай справовалні признакы и симптомы; у случайови несиндромных, другі абнормалності попри інтелектуалну недостаточность ся не просліжувут. Синдром Давна тай синдром ламкої хромосомы X тото приклады синдромных інтелектуалных інвалідностий.

Епідеміолоґія Приблизно 2–3% світового населеня мавут інтелектуалні інвалідності. 75–90% из них мавут легкі інтелектуалні нарушеня. Несиндромні вадь ідіопатичні трафункы чинят 30–50% из них. Приблизно четвертина трафункув мавут причинов ґенетичноє нарушеня, а коло 5% трафункув наслідствені. Інтелектуалні інвалідності ся май часто трафлявут у чоловікув тай у крайинах из пудлов авадь просіковов фінанчнов ситуаційов.

Подля податкув 2015. рока, у світі є 153 міліонув людий из інтелектуалнов інвалідностьов.

Симптомы Інтелектуална інвалідность провказує ся у дітинстві тай обсягує недостаточность у менталных можностях, соціалных навыках и основных активностях кажджоденного жывота (ADL, ) у порувнаньови з ровесниками. Легкі інтелектуалні інвалідності часто не мавут фізичных признакув, айбо у трафункови з подакотрыма ґенетичныма нарушенями годні ся появляти характерні фізичні рисы (напр. синдром Давна).

Уровень нарушеня можностий є індивідуалным. Межи ранньыма признаками сут:

Задержка вадь неможность досягнути подакотрі етапы розвоя моторных навыкув (сидіня, повзаня, хожіня). Задержка в научіньови говорити вадь далші сложності у бесідованю тай языковых навыках по зачатку говоріня. Сложность из самопомочов и дозираньом за собов (напр. убираня, мытя, їдіня). Недостаточность плановалных навычок авадь навычок у рішеньови проблем. Проблемы зо справованьом авадь соціалного характера. Неможность інтелектуалного росту вадь інфантилноє, діточоє справованя. Проблемы из академічным ошколованьом. Неможность адаптовати ся д новым ситуаціям. Сложность из розуміньом авадь додержованьом соціалных правил.

Класифікація

Легка інтелектуална інвалідность У раннюм дітинстві легка інтелектуална інвалідность (; IQ 50–69) годна быти неочевиднов, докідь дітвак не пуйде у ошколу. Айбо даже у случайови проблем из академічным ошколованьом потребна експертна оцінка, обы розличити межи легков інтелектуалнов інвалідностьов тай конкретным нарушеньом учіня вадь емоційным ци справовалным нарушеньом. Челядь из легков інтелектуалнов інвалідностьов годни научити ся читати тай мати математичні навыкы на приблизнум уровни типової 9–12-ручної дітины. Они бирувут научити ся дозирати за собов тай мати практичні навычкы, наприклад знати ріхтовати їдіня вадь хосновати громадськый транспорт. Дорослі из інтелектуалныма інвалідностями годні ся научити жыти самостуйно и мати прибыткову роботу. Помірна інтелектуална інвалідность Помірна інтелектуална інвалідность (; IQ 35–49) практично фурт ся провказує у перші рокы жывота. Задержка бесіды (алалія) тото особо частый признак помірної інтелектуалної інвалідности. Люде з помірными інтелектуалными інвалідностями потребувут пудпоры у ошколі, дома и у комуніті про повноцінну участь. Хоть їхньый академічный потенціал ограниченый, они годні ся научити базовым медицинськым и безпековым навыками тай участвовати у простых активностьох. Дорослі из помірнов інтелектуалновв інвалідностьов годні жыти в рокаши зо свойов старшинов, у притулках авадь „ґруповых хыжах“ (, брит. анґл. care home) авадь даже напувсамостуйно из читавов помочов, наприклад в управліньови фінансами. Они годні робити у шпеціалных „притулковых робутнях“ (). Приблизно 10% людий из інтелектуалныма інвалідностями мавут помірну варіацію.

Тяжка тай глубока інтелектуална інвалідность Челядь из тяжкыми інтелектуалными інвалідностями (; IQ 20–34; 3.5% случаюв) тай из глубокыма (; IQ 19 авадь низше; 1.5% случаюв) потребувут ищи май інтенсивну помуч тай дозираня усьый їхньый жывут. Они годні научити ся чинити подакотрі активності кажджоденного жывота, айбо тяжка тай глубока інтелектуална інвалідность типово обсягує неможность самостуйно дозирати за собов без читавої чужої пудпоры даже у дорослых роках. Люде из глубоков інтелектуалнов інвалідностьов повнустю залежат на другых про всі активності кажджоденного жывота тай про додержаня фізичної безпекы и здоровля.

Термінолоґія Подля днешньої тенденції хоснованя політкоректної лексикы, термін „інтелектуална інвалідность“ (, курто ID) став преваловати межи зглядователями тай пропонентами борьбы за права тай достойноє удношіня д людьом из інвалідностями у многых анґліцькоязычных крайинах. У обзвідованю 2012. рока з выборков у 101 канадського професіонала у медицинськуй сфері, 78% респондентув уповіли, ож хоснувут термін „розвойова задержка“ () у бесідах из родаками, вмісто „інтелектуалної інвалідности“ (8%). Выразы катеґорії „особеный“ (), „особі потребы“ (), „challenged“ ся знавут пораз хосновати, айбо пуддавут ся критиці за „пудкріпленя ідеї, ож челядь не годна ся справити из свойима інвалідностями“.

У словянськоязычному просторі дотеперь ся активно хоснувут терміны як „ментална ретардація“ (, , , ), „розумова удсталость“ (, , ) котрі у западных крайинах уже ся держат ги неполіткоректні тай позад того неприпустимі.

Термін „ментална ретардація“, котрый ся появив позад представленя, ож такі хвороты выникавут ги резултат задержок (т. є. ретардацій) природного розвоя дітины, быв уведеный у DSM-IV Америцької психіатричної асоціації тай ICD-10 Всесвітньої орґанізації з охороны здоровля (коды F70–F79). У слідувучуй ревізії, ICD-11, тот термін замінили на „нарушеня інтелектуалного розвоя“ () пуд кодами 6A00–6A04 (6A00.Z про „невызначеный“ код діаґноза). Термін „інтелектуална інвалідность (нарушеня інтелектуалного розвоя)“ () хоснує ся у DSM-5. У анґліцькоязычных крайинах термін „ментална ретардація“ щи ся хоснує у поєдный професійных контекстах, наприклад в урядовых проґрамах помочи вадь діловодстві медицинського страхованя.

Історична термінолоґія поступово уйшла из хоснованя позад набытя неґативної, пейоративної коннотації. Терміны „ментална ретардація“, „ментално ретардованый“ стали популарныма у середині 20. стороча як заміны пруйшлых еквівалентув, такых як „імбеціл“,Fernald, Walter E. (1912). The imbecile with criminal instincts. Fourth edition. Boston: Ellis. OCLC 543795982. „ідіот“, „слабоумный“, „дебіл“ (), котрі теперь ся держат пейоративными. Пуд конець 20. стороча слова „ретардація“ тай „ретард“ у анґліцькоязычнум окруженю стали політично некоректныма тай потребовали заміну.

Общество и култура До середины 20. стороча, челядь из інтелектуалныма інвалідностями часто ся выключала из державного школованя вадь ошколовала ся удділно уд типовых дітий. Аж порувняти їх из ровесниками, котрый сеґреґувут у шпеціалні школы, учні, котрых „мейнстрімлят“ (т. є. котрі ся учат повнустю вєдно з типовыма дітьми) вадь часточно ся учат у обычных класах мавут похожый уровень стіґмы тай соціалної самоконцепції, айбо май амбіційні планы на занятость. У дорослому віці они годні жыти самі, з родинов авадь у разных филях закладув про помуч людьом из інвалідностями.

Пудкарпатя В Ужгороді фунґувут маймало чотыри інклузивні ініціативы про людий из інвалідностями, у тум числі інтелектуалныма: тото два діточі плацикы, удкрыті у 2024. рокови на ул. Богдана Хмельницького тай у Боздошському паркови; інклузивна фотбалова секція на базі Ужгородської общої спеціалізованої інтернатної школы на ул. Загорськуй; інклузивноє кафе „Янгол“ при Свято-преображенському греко-католицькому храмі, у котрум по три годины роблят воспитаникы благочинного фонда „Карітас“ из інтелектуалныма інвалідностями.

Людські права и юридичный статус У юридичному контексті люде з інтелектуалными інвалідностями часто мавут ограничені людські права тай слободы, наприклад право голосовати, право вести бізніс, право чинити договоры, право ся побирати, право на школованя. Конвенцію Орґанізації Зєдиненых Націй за Права людий из інвалідностями, котра закладат мінімалный стандарт прав про людий из інвалідностями, ратифіковали булше ги 180 держав. У подакотрых державах Европської унії, як и в подакотрых штатах США, люде з інтелектуалныма інвалідностями не мавут выборчого права. Европськый суд у людськых правах у 2010. рокови у ділі Олойоша Кіша против Мадярщины постановив, ож Мадярщина не годна ограничовати право голосовати сугубо на основі того, ож челядник має опікуна позад психосоціалної інвалідности.

Ник. щи

Інвалідность

Референції

Катеґорія:Інвалідності Катеґорія:Социалны проблемы