Пол авадь поглавя є біолоґічна риса множачого ся половым способом орґанізма, котра вызначає выробленя ґамет єдного из двох розмірув авадь форм — чоловічых авадь жунськых ґамет. Тіпово такі орґанізмы ся тоже класифікувут як чоловічого вадь жунського полу. Бігом полового розмножіня чоловіча и жунська ґаметы ся зливавут, обы сформовати зіґоту, котра ся розвиват у потомка, котрый наслідує рисы уд кажджого из родакув. Орґанізмы, котрі продукувут май малі ґаметы (сперматозоїды) сут самці тай ся удносят ид чоловічому полу, а орґанізмы, котрі продукувут май великі ґаметы (яйцьоклітины) — сут самиці тай удносят ся ид жунському. Орґанізм, котрый выробляє обадва тіпы ґамет, кличе ся гермафродіт.
У негермафродітськых видув пол орґанізма ся вызначає єднов из дакулькох біолоґічных систем; про бульшину ссавцюв ся пол вызначає подля XY-системы, де самець як правило має X- тай Y-хромосому (XY), а жона — дві X-хромосомы (XX). Другі системы тото ZW-система у потят тай XO-система у дакотрых овадув. Температурозалежна система ся трафлят у рептилій тай раковидных.
Самці тай самиці єдного вида годні быти фізично похожі (половый мономорфізм) вадь мати фізичні удликы (половый діморфізм). Полова селекція вадь выбор партнерув годні ускорити розвуй розлик межи полами.
Референції