Максі́м Серґе́євіч Марцінке́віч (; 8. мая 1984, Москва – 16. септембра 2020, Челябінск), знамый радше під псевдонімом Теса́к (з „сокыра“, „ручный клин", „мачета“) быв російскый публічный чінитель, неонацістічный відеоблоґер, сполузакладатель і ідеолоґ неформалного меджінародного публічного руху „Реструкт“, котрый дїяв в постсовєтьскім просторї.

Марцінкевіч ся по першыраз прославив як скінгед з руху НС і лідер неонацістічной молодежной орґанізації „Формат 18“. Быв трираз одсудженый на трест однятя слободы подля статї 282 Трестного кодекса Російской федерації. В роцї 2007 было проти нёму по першыраз отворены трестны обвинїня по тім, што він і ёго сполубоёвници із поужытём фашістічных гесел нарушыли лібералный колоквіум в клубі „Білінґва“. В роцї 2009 быв другыраз одсудженый на три рокы за відеокліп із расістічным обсягом, што суд кваліфіковав як розпалёваня к меджіетнічній ненавісти. Споминкы на трестны перенаслїдованя і три і піврока арешту ся стали основов книгы „Реструкт“, котру написав по пропущены. По пропущены на слободу Марцінкевіч нїґда не працовав, лем вів відеоблоґ і жыв з средствами, котры діставав од тых, котры ся хотїли брати участь „лову на педофілів“, з орґанізованя платовых семінарів о жывотї во вязніцї, о тім, як красти в обходах і т. д.

В роцї 2013 быв Марцінкевіч по третїй раз обвиненый подля статї 282 Трестного кодекса Російской федерації за опублікованя контроверзных відей. 15. авґуста 2014 быв одсудженый на пять років арешту в направновыходнім заряджены із строгым режімом (пізнїше быв трест скороченый на 2 рокы і 10 місяцїв). На осїнь 2016 мав Марцінкевіч выйти на слободу, але уж во вязнічній колонії му были отворены новы обвинїня і зістав во вязніцї. 27. юнія 2017 быв Марцінкевіч одсудженый на 10 років однятя слободы в направновыходнім заряджены із строгым режімом в звязаности із припадом атак на продавачів сінтетічных дроґ, котры ся одограли у рамках проєкту „Оккупай-Наркофиляй“. В маї 2018 Московскый містьскый суд зрушив вердікт, але в децембрї того істого року Бабушкіньскый суд в Москві зась одсудив Марцінкевіча на єднакый трест. Вєдно із ним быв на реалны тресты однятя слободы одсудженый ай ряд ёго сполупрацовників. В новембрї 2018, почас побытю во вязніцї, Марцінкевіч выголосив, же є лібертаріан.

16. септембра 2020 быв Марцінкевіч найденый мертвый во своєй вязнічній целї.

Референції