Кріштя́ну Рона́лду душ Са́нтус Аве́йру, знамый ги Кріштяну Роналду вадь CR7 ( ; рожд. 5. фебруара 1985, Фуншал, Мадейра, Портуґалія) є портуґалськый професійный фотбалішта, нападник и капітан клуба Ал-Наср Саудської професійної ліґы и портуґалської націоналної зборної. Ун ся держит за єдного з майліпшый бавлячув у історії фотбалу; має пять Золотых лобд ФІФА, три нагороды ги Майліпшый бавляч року межи чоловіками УЕФА, чотыри Золоті копачкы. Быв пятьраз уголошеный Майліпшым бавлячом у світі ФІФА.
Кріштяну Роналду — єден из майнагородженых професійных фотбаліштув: за свою карєру ун уйграв 35 трофеюв, у тум числі пять чемпіонськых ліґ УЕФА, дві націоналні ліґы УЕФА и Европськый чемпіонат УЕФА. Ун держит рекорд за майвеликоє число: ґолув (140) и ґоловых передач (42) у чемпіонськуй лізі; ґолув (14) и ґоловых передач (8) у Европському чемпіонаті; межинародных выступув за націоналну зборну (233), межинародных ґолув межи чоловіками (146), межинародных побід (141). Ун єдиный бавляч, котрый забив 100 ґолув за чотыри разні клубы и фінішовав из майвеликым числом ґолув у чотырьох разных домашньых ліґах. Професійно вун выступив булш як 1,300 раз и забив булш як 970 офіційных ґолув за дорослу карєру за клуб и зборну, што го чинит майуспішным забивачом ґолув за вшыток час.
Біоґрафія Кріштяну Роналду душ Сантус Авейру ся родив 5. фебруара 1985. року у районі Сан Педру в Фуншалі, столици автономного реґіона Мадейра в Портуґалії. Урус у сосідньому районі Санту Антоніу. Його мати, Марія Долорес душ Сантус Вівейрус Авейру, робила поварихов и харитьов. Його втець, Хосе Дініс Авейру, быв муніципалным загородником (садовником) про місну власть Санту Антоніу и пудробляв завідувучым екіпірованьом у фотбаловому клубі Андоріня. Отець Роналду служив у портуґалськуй армії бігом Портуґалської колоніалної войны и участвовав у бойовых діях в Анґолі; тото го травматизовало так, ож ушыткый жывут мав проблему з алкоголізмом. Через прабабку, Ізабел да Пєдаде, рождену на острові Сан Вісенті (товды Портуґалськоє Кабу Верде), Роналду має кабувердські коріня.
Роналду має старшого брата Угу и дві сестры, котрых звут Елма и Ліліана Катя. Їх отець честовав президента США Роналда Рейґана и назвав на його честь Роналду. Мати Роналду розказала, ож позад худобы, алкоголізма чоловіка и позад того, ож уже мали повно дітий, хотіла вчинити аборт, кой уношовала Роналду, айбо єї дохтор удказав ся правити таку операцію. Роналду урус у біднуй католицькуй файті, мусів ділити комнату з братом и сестрами, и продовжує ідентифіковати себе католиком у дорослум віці. У юности вун ідолізовав бразільськых фотбаліштув Роналду и Роналдіню.
Референції
Катеґорія:Фотбал Катеґорія:Фотбалісты