Nuevo Aragón estió un periodico aragonés en luenga castellana editau diariament, fueras d'os luns, entre o 20 de chinero y l'11 d'agosto de 1937 en a localidat baixoaragonesa de Casp. De caracter anarquista, funcionó como medio oficial d'o Consello Rechional de Defensa d'Aragón.
Historia O Consello d'Aragón, formau en octubre de 1936 seguindo o modelo d'a Cheneralidat de Catalunya, yera formau por 13 consellerías que, en primeras, yeran dirichidas por miembros d'a CNT y que dimpués s'ubrioron a consellers d'a UGT y o PCE. Asinas yera un medio de clara influyencia anarquista, con gran parti d'o equipo redactor y o suyo primer director, Carlos Gamón, procedents de Barcelona a on heban feito parti d'o periodico anarquista Solidaridad Obrera.
En o periodico se daba voz en as diferents seccions a ministros d'a CNT que formaban o gubierno de Largo Caballero, como Joan Peiró u Federica Montseny, asinas como a os consellers d'o Consello d'Aragón. En as suyas ueito pachinas s'informaba amás d'o desarrollo d'as accions belicas, as fainas de colectivización d'a tierra y os medios de producción y propaganda ideolochica contra l'enemigo faixista. I heba tamién una sección d'información local de Casp.
Fació parti activament d'a publicación o debuixant satirico Luis Bagaría, qui estió un d'os prencipals caricaturistas espanyols d'a primera metat d'o sieglo XX. Entre as suyas vinyetas, que apareixen en cuantos numeros d'o periodico, ye recurrentment a caricatura d'o cheneral Francisco Franco.
Vinclos externos Nuevo Aragón. Hemeroteca Digital. Biblioteca Nacional de España. Nuevo Aragón. Catálogo Colectivo de la Red de Bibliotecas de los Archivos Estatales. Primer exemplar de Nuevo Aragón. Hemeroteca digital. Arxiu Històric de la Ciutat de Barcelona. Edición Facsimil de Nuevo Aragón d'o 9 de marzo de 1937.
Categoría:Periodicos desapareixius d'Aragón Categoría:Periodicos en castellano Categoría:Consello Rechional de Defensa d'Aragón