Manuel Eduardo Latorre Salas (Creixenzán, 11 de febrero de 1913 - Caracas, 26 de chunio de 1975) estió un mayestro, politico y sindicalista aragonés, consellero de Cultura d'o Consello Rechional de Defensa d'Aragón.
Biografía Prencipió os suyos estudios en 1927 en a Escuela Normal de Uesca pa dimpués treballar como mayestro en a escuela de ninos Nº2 de Chaca. En l'anyo 1930 ingresó en l'Agrupación Socialista (PSOE) de Uesca estando tamién mas tardi secretario y vicepresident d'a FETE (UGT) d'ixa mesma ciudat.
En esclatar a Guerra Civil Espanyola s'amagó en as primeras semanas dica que podió eslampar ta Balbastro. En a primera reforma d'o gubierno d'o Consello Rechional de Defensa d'Aragón en aviento de 1936 fue nombrau consellero de Cultura y delegau cheneral d'Amostranza, cargos que mantenió dica marzo de 1937 cuan albandonó o gubierno por malautía, deixando o puesto a o suyo companyero d'a UGT Malaquías Gil. Ixe mesmo anyo s'incorporó en octubre a l'exercito d'a Republica fendo parti d'o 3er Batallón d'a 102ena Brigada Mixta. En primerías se 1938 se treslada ta Barcelona a on, dimpués d'exercer de comisario politico a o servicio d'a Presidencia d'o Gubierno, s'incorpora a o 21er Batallón d'a 6ena Brigada Mixta.
En rematar a guerra marchó ta Francia, arribando a París l'11 de marzo de 1939. Dende astí solicitó aduya pa tresladar-se ta Mexico, viachando finalment enta a Republica Dominicana, arribando ta Ciudad Trujillo o 7 de noviembre de 1939. Treballó de profesor y achent en ista localidat dominicana dica a o menos 1950. Dimpués vivió en Mexico, a on fació parti de l'Agrupación Socialista Espanyola d'o PSOE, pa tresladar-se en zagueras ta Venezuela, a on se casó o 17 de chunio de 1961. En os suyos zaguers anyos vivió entre a Republica Dominicana y Venezuela, morindo en Caracas o 26 de chunio de 1975.
Vinclos externos Manuel Latorre Salas. Fundación Pablo Iglesias. Manuel Eduardo Latorre Salas en Con Nombre & Apellidos. Expo Consejo de Aragón
Categoría:Gubierno Ascaso Categoría:Exiliaus aragoneses en Mexico Categoría:Exiliaus aragoneses en a Republica Dominicana Categoría:Exiliaus aragoneses en Venezuela Categoría:Exiliaus d'o franquismo Categoría:Mayestros d'Aragón Categoría:Muertos en Caracas Categoría:Naixius de Creixenzán Categoría:Politicos d'Aragón Categoría:Politicos d'o Partido Socialista Obrero Español Categoría:Sindicalistas d'Aragón Categoría:Sindicalistas d'a Unión General de Trabajadores Categoría:1913 (naixencias) Categoría:1975 (naixencias)