Маргарет Митчелл, Margaret Munnerlyn Mitchell Marsh, , Атланта — , тыж там — америцка писателька, авторка романа Однесены вѣтром, Gone with the wind, 1936.Ellen F. BrownКадомцева С. Ю.Михальська Н., Щавурський Б.
Маргарет росла в фамилии, де оба ей дѣды много росповѣдали о своих зажитках з добы Домовой войны в США, котра ся завершила вшиткого за 35 рокы до ей уроджѣня. Битанга дѣвчатиско, Маргарет ся бавила на войну в земляных укрѣплѣнях, котры ещи окружали ей родный город Атланту. Твердо любила тыж читати и в молодости написала вельо повѣдань. Яко внучка плантаторох-южан позирала на войну Юга и Сѣвера очима южанкы. Во своей юности была напорлива, хотѣла и знала выпробовати вшиткы свои можности. По закончѣню мѣстной школы одышла на сѣвер, де ся зачала учити в гуманитном женском Смит-коледжу в Массачузетсу (1918), але наступного року, коли умерла ей мати, вернула ся до Атланты, жебы вести газдовство про свого няня и брата. В роках 1922–1926 под псевдом Пегги Митчелл працовала про мѣстный тыжденник Атланта Джорнал и так ся стала в родинѣ первов женов, котра сама собѣ заробляла на живот. Первый ей муж указав ся пяницьов и насилником, и Маргарет инициовала розвод. Друге малженство (1925) з Джоном Маршом было щастливе, Джон Марш став ся ей помочником, порадником и цѣнительом в литературной роботѣ. В року 1926 через травму ногы и наступный артритис мусѣла лишити репортерску роботу и цѣлком ся оддала писаню романа о домовой войнѣ, котрый забрав ей 10 рокы. Роман Однесены вѣтром вышов 30. юна 1936 и мѣстив вельо навѣяного родинныма повѣданями, а дашто и биографиев Маргарет. История пережитя его протагонисткы Скарлетт серед окрутностей войны и ей наслѣдкох мала одозваня у читательох цѣлого свѣта. За един день продали ся пятьдесять тысяч екземплары; за шѣсть мѣсяци выдали милион екземплары. Истории выдавательства США ещи не мала романа з векшым накладом. Ку зачатку XXI. стороча по цѣлому свѣтѣ ся продало над 30 милионы копий на понад 40 языках.
В року 1937 Маргарет Митчелл достала престижну награду Пулитцера за «лѣпшый роман рока». 15. децембра 1939 в Атлантѣ одбыла ся премьера филма з Вивьен Ли и Кларком Гейблом, котрый в року 1940 выграв 8 наград Оскар з 13 номинаций и ещи двѣ шпециалны награды. За наступны 30 рокы тот филм и его ререлизы в США и по свѣтѣ принесли найвекшый зыск в истории филмовой продукции. Президент Гарри Трумен назвав М. Митчелл «умѣлкыньов, што подаровала свѣтови безсмертну книгу». 11. августа 1949 писательку, як переходила дорогу, идучи до кина, зразило авто, причинивши тяжкы раны, через котры по пятьох дньох умерла.
Жерела и одказы
Кадомцева С. Ю. МИТЧЕЛЛ //Большая российская энциклопедия. Том 20. Москва, 2012, стр. 473 Верзия: 2017. Одчитане: 06.11.2020 Михальська Н., Щавурський Б. (ред.): Мітчелл, Маргарет //Зарубіжні письменники. Енциклопедичний довідник у двох томах. — Тернопіль: Навчальна книга – Богдан, 2006 Obituary: Miss Mitchell, 49, Dead of Injuries, (August 17, 1949) New York Times.
Референции
Катеґорія:Англоязычны писателе