Даниела Фернанда Доминика Мюриел Емили Шулейн-Стил ( Danielle Fernande Dominique Muriel Emily Schuelein-Steel; *14. август 1947, Ню Йорк, США) — америцка писателька множества романох, котры ся стали бестселерами. Даниела Стил — четверта найвекша бестселерова писателька вшиткых часох зоз сумарным накладом ей книг понад 800 млн екземплары. До року 2021 написала 190 книжок, з того понад 140 романы.
Биография Походить зоз мѣшаной родины: отець Джон Шулейн-Стил (John Schulein-Steel) — нѣмецко-еврейскый имигрант з родины властникох пивоварной значкы Löwenbräu, мати — Норма да Камара Стоун Рейс (Norma da Camara Stone Reis) з родины португалского дипломата. Ей родителе ся розвели, як мала восѣм рокы, и выростала переважно при отцю, лем зрѣдка при матери. Воспитана в католицкой вѣрѣ, подумовала в молоды рокы пойти до клаштору.
По штудиях на Нюйоркской универзитѣ працовала в пропагачно-рекламной агенции и писала статьи до новинок. Еден ей клиент, редактор Ladies' Home Journal Джон Мак Картер, переятый тыма статьями, нарадив ю писати книгы, а она так и вчинила.
Перенесла ся до Сан Франциска и писала. Ей первый роман «Вернутя дому» (Going Home) вышов в року 1973. Обсяговав многы темы, вдяка котрым пак ей творба стала ся широко позната, як акцент на проблемах родины и людскых односинах. Ей односины зоз другым мужом дали импулз наступным двом романам, «Передчутя любости» (Passion's Promise) и «Теперь и навсе» (Now and Forever), котры зачали ей карьеру. По успѣху четвертой книгы «Обѣцяня» (The Promise) была прията до высшого сполоченства Сан Франциска.
Была пять раз оддана и пять раз розведена и мала девятеро дѣти. Бывать во своих резиденциях в Сан Франциску и в Парижу. Основала и утримуе два харитативны фонды: на помочь дѣтям и бездомовцям. Наперек свому публичному статусу, Даниела Стил скромна, затѣнчлива и не любить мати интервю з новинарями.
Творба Еден роман ей забере два-три рокы, але пише едночасно до пять романы нараз. Зображуе свѣт богатых и славных. Дакотры твердять, же черпать идеи про свою творбу з властного живота. Авторка контруе тым, котры ей популарность высвѣтлюють так, же тото легке чтиво же романы суть шаблоновы и напханы солодков ватов, напротив, она ся шпыртать з тяжкыма аспектами людского живота и натуры, як инцест, самозабивство, розвод, война, аж и голокауст. 22 ей книгы суть нафилмованы про телевизию. Окрем любовных романох написала 18 книг про дѣти, зберьку поезий и спѣванковы тексты.https://daniellesteel.com/about-danielle/ About Danielle Steel
Референции
Катеґорія:Англоязычны писателе