Nuberu ye un vehículu aereu non tripuláu o dron desarrolláu pol equipu estudiantil 4Space UniOvi de la Universidá d'Uviéu como sistema de sofitu pal rover Tras2. Presentóse oficialmente a finales de mayu de 2026 xunto col rover y foi diseñáu pa participar nel European Rover Challenge (ERC), competición internacional universitaria de robótica espacial.«4Space presenta su nuevo rover TRAS2 y el dron Nuberu», Colexu Oficial d'Inxenieros Industriales del Principáu d'Asturies, 2 de xunu de 2026. El desenvolvimientu forma parte del programa 4Space, un proyeutu extracurricular y voluntariu nel que participen estudiantes de distintes especialidaes de la Universidá d'Uviéu.«L'equipu 4Space de la Universidá d'Uviéu va competir na final europea de robótica espacial», Europa Press, 29 de xunu de 2026.
El dron utiliza una configuración de 12 pulgaes, escoyida pa aumentar la estabilidá en vuelu, l'autonomía y la capacidá de carga frente a diseños de menor tamañu.«Nuberu es el dron en el que he estado trabajando junto con mis compañeros de 4Space Uniovi», Daniel Álvarez, integrante de 4Space UniOvi, 2026. Incorpora capacidá de computación a bordu destinada al usu de visión artificial y al procesamientu de videu en tiempu real, de manera que puede recoyer y procesar información visual durante una misión ensin depender exclusivamente d'un sistema esternu. Estes carauterístiques permiten utilizalu como plataforma aérea complementaria a Tras2 en xeres de navegación, percepción y reconocencia del terrén.
Nuberu y Tras2 clasificáronse en xunu de 2026 pa la fase final del European Rover Challenge 2026, prevista del 1 al 8 de setiembre en Cracovia, Polonia. Na fase clasificatoria participaron 123 equipos, frente a los 102 de la edición anterior, y 4Space UniOvi consiguió clasificase pa la final per segundu añu consecutivu. Les pruebes de la competición reproducen situaciones inspiraes na esploración planetaria, incluyendo navegación autónoma, recoyida y análisis d'amueses, perforación del sosuelu y operaciones en redolaes con comunicaciones acutaes. Nuberu incorpora especialmente funciones de percepción aérea y procesamientu visual como sofitu a les operaciones del rover.
El desenvolvimientu de Nuberu supunxo la incorporación d'un vehículu aéreu al proyeutu 4Space, que na edición de 2025 compitiera nel European Rover Challenge col rover Trastu. La nueva configuración de 2026 combinó'l rover evolucionáu Tras2 col dron, ampliando les posibilidaes de navegación y observación del equipu. El proyeutu cuenta col sofitu de Xixón Impulsa y de más d'una trentena d'entidaes collaboradores y patrocinadores vinculaos a los ámbitos industrial, tecnolóxicu y universitariu. La presentación oficial de Tras2 y Nuberu contó amás con representación de la Universidá d'Uviéu, l'Ayuntamientu de Xixón, el Gobiernu del Principáu d'Asturies y l'Axencia Espacial Española.«Presentación oficial del rover Tras2 y del dron Nuberu», 4Space UniOvi, 2026.
Referencies
Enllaces esternos 4Space UniOvi European Rover Challenge
Categoría:Vehículos aéreos non tripulaos Categoría:Robótica n'Asturies