Бабру́йск — метэаралагічная станцыя, размешчаная на паўночна-заходняй ускраіне горада Бабруйска.
Гісторыя Метэаралагічныя назіранні ў Бабруйску былі распачаты ў 1836 годзе. Даныя за перыяд з верасня 1836 па жнівень 1837 года былі апублікаваны ў працы К. Весялоўскага «Аб клімаце Расіі». З 1884 па 1904 год з перапынкамі праводзіліся назіранні па праграме станцыі III разраду.
У 1901 годзе была адкрыта станцыя II разраду пры школе садаводства, якая працавала да 1914 года. З гэтага часу станцыя працуе па праграме метэастанцыі 2-га разраду. Кароткі час, з 1930 па 1931 год, існавала метэастанцыя пры Бабруйскім музеі.
Назіранні былі адноўлены ў 1946 годзе. Значнай падзеяй стаў перанос станцыі 27 чэрвеня 1968 года на 12 км на паўночны захад ад ранейшага месцазнаходжання, на тэрыторыю аэрапорта ў раёне вёскі Сычкава. Станцыя атрымала статус АМСГ IV разраду і з таго часу назіранні вядуцца бесперапынна. У выніку пераносу вышыня станцыйнага барометра змянілася са 165 м да 156 м над узроўнем мора. На працягу другой паловы XX стагоддзя на станцыі ўводзілася і мадэрнізавалася рознае абсталяванне, уключаючы плювіёграф (1951—1978), прыбор для вымярэння вышыні ніжняй мяжы аблокаў ІВА (1968), шарапілотныя назіранні (1968—1985), а таксама аўтаматычныя метэаралагічныя станцыі М-106 (1970—1972) і М-106М (1976—1985).
Кліматычная характарыстыка Матэрыялы назіранняў станцыі з’яўляюцца паказальнымі для тэрыторыі ў радыусе 25—35 км. Працягласць перыяду з сярэднесутачнымі тэмпературамі паветра вышэй за 0 °C складае 237 сутак, вегетацыйны перыяд — 193 суткі, безмарозны — 154 суткі. Апошні замаразак у паветры назіраецца 30 красавіка, першы — 2 кастрычніка.
Сярэднемесячная тэмпература паветра ў студзені вагаецца ад −0,7 °C (1975) да −14 °C (1950), у ліпені ад 15,6 °C (1904) да 21,4 °C (1959). Гадавы абсалютны мінімум тэмпературы паветра ніжэй за −34 °C і абсалютны максімум вышэй за 35 °C назіраюцца ў сярэднім раз у 20 гадоў. Тэмпература паверхні глебы зімой раз у 20—30 гадоў апускаецца да −42 °C.
Сярэдняя сумарная працягласць сонечнага ззяння за год складае 1296 гадзін, летам — 160 гадзін, зімой — 574 гадзіны. Раз у 9 гадоў ападкаў выпадае больш за 700 мм, у засушлівыя гады — да 450 мм. Сярэдняя максімальная вышыня снегу за зіму дасягае 21 см, у асобныя гады — да 40 см. За год налічваецца 121 вільготны дзень (з адноснай вільготнасцю ≥80 %) і 11 сухіх дзён (з вільготнасцю ≤30 %).
Сярэдняя колькасць сутак з мяцеліцай за год складае 14 (максімум 27), з туманам — 52 (максімум 76), з навальніцай — 28 (максімум 38), з градам — 1 (максімум 8). За год у сярэднім бывае 36 сутак з галалёдна-шэраневымі з’явамі.
Сучасны стан Станцыя размяшчаецца на выездзе з Бабруйска, побач з вёскай Сычкава, і дзеліць дах з Бабруйскім аэраклубам ДТСААФ. Паводле стану на 2022 год, у штаце працавала сем чалавек, уключаючы начальніка, інжынера-аграметэаролага і тэхнікаў-метэаролагаў. Прыкладна ў 2007 годзе станцыя была абсталявана аўтаматычнай сістэмай, аднак паводле сусветнага стандарту ўсе паказчыкі працягваюць фіксавацца і дубліравацца ўручную.
Тэхнікі-метэаролагі перадаюць звесткі аб надвор’і восем разоў на суткі («восем тэрмінаў»). Інфармацыя паступае ў Магілёўаблгідрамет, затым у Мінск, Маскву і Грынвіцкую каралеўскую абсерваторыю. Навукова абгрунтаваныя прагнозы, заснаваныя на даных беларускіх метэастанцый, публікуюцца на сайце pogoda.by.
Крыніцы
Літаратура
Катэгорыя:Метэаралагічныя станцыі Беларусі Катэгорыя:З’явіліся ў 1836 годзе Катэгорыя:Бабруйск