Minecraft (анґл. mine — «баня; добывати», craft — «ремесло; правити, майстровати») — компютерна інді-бавка у жанрови пісковниця, уд Mojang Studios. Бавку написав проґраматор Маркус Персон на языкови проґрамованя Java. Зачаткова версія бавкы была выдана в 2009 році, стабілна версія выдана в кунци 2011 року.
Minecraft — майпродавана компютерна бавка в історії: на 2023 рук ся продало верьх 300 міліонув копій на вшиткых платформах. Уд першого выданя на персоналні компютеры была адаптована до бавковых консол и мобілных девайсув. На днешньый день бавка має дві паралелно обновльовані версії-«выданя»: «Java Edition», котрый є прямым продовженьом написаного на Java «ориґінала» и «Bedrock Edition» — написана на C++ версія, котра на удлику уд ориґінала пудпорує булше платформ, обсягує «базар», на котрому ся продає додаточный контент и удличат ся як функціонално, так и свойим уднушньым устройом.
Minecraft поміщат бавляча в процедурно выґенерованый тримірный світ, складеный из коцок, котрі пак мож перескладовати на многі способы. Бавляч не має конкретну ціль: годен розвідовати світ, добывати хоснаві матеріалы, бити ся з противниками и так дале. Бавка має специфічні режимы, межи котрыми «выживаня», де бавляч має сам добывати ресурсы, и «креативный», де бавляч уже має неограничені ресурсы.
Русинськый переклад Minecraft став першов компютернов бавков, перекладенов на русинськый язык. Ініціатором перекладу быв Юрко Капац, адміністратор вебсайта Rueportal. Русинська версія бавкы офіційно додана 26 октовбра 2022 року (версія 1.19.3).
Референції
Катеґорія: Компютерні бавкы