Комары (Culicidae) тото родина малых двакрылых овадув, котра ся чинит 3,600 видами. Комарі мавут тонкі, членковані (сеґментовані) тіла, єдну пару крыл, три пары довгых, тонкых лабок и спеціалный дуже довгый хоботок: вшыткі комарі пют нектар из косиць; самиці многых видув комарув ся адаптовали д пробиваню кожі хребетных и ссаню їхньої крови. Ґрупа ся диверзифіковала у крейдовый період. Еволуційні біолоґы розникувут комарув ги мікрохыжакув — малых звірькув, котрі паратизувут на май великых через питя їхньої крови без забиваня. Медичні паразитолоґы розникувут комарув ги переносникув бетегув, бо тоты переносят майпростых паразитув авадь бактеріалні тай вірусні патоґены уд єдного орґанізма до другого.
Цикл жывота комара має чотыри етапы: яйце, ларва (личинка), бабовка тай доросла особина. Яйця ся выношувут на поверьхность воды; з них ся улуплювут ларвы, котрі ся жывлят водоростами тай орґанічнов матерійов. Ларвы комарув сут важным жерелом їдіня про многых прісноводных звірюв, наприклад бабок-німф, многых видув рыб и подакотрых потят. Подакотрі виды комарув несут яйця лиш по питьови крови.
Слина комарув трафляє до орґанізма з укусом и годна спричиньовати чуханя. Пючі кров виды комарув годні переносити через укусы паразитичні хвороты, такі як маларію тай філаріоз, тай арбовірусні бетегы ги жовту горячку и горячку денґе. Позад переношіня хворот комарами умират булш ги міліон людий кажджый рук.
Референції