Гавриил Бескид (*28. септембра 1929, Кошицѣ, Чехословакия – †22. септембра 2022, Пряшов, Словакия) — педагог, русинскый публициста, сполоченскый дѣятель.Михаил ДроновМария Мальцовска, Александер ЗозулякПетро Медвідь, Анна Кузмякова
Животопис Гавриил Бескид ся уродив 28. септембра 1929 в Кошицях до родины Евгена Бескида и Марты, родж. Холошняйовой. Дѣтство перебыв у русинском селѣ Легнава, Старолюбовнянского окресу, де отець му быв за 35 рокы грекокатолицкым священиком. В селѣ выходив основну школу, пак руську гимназию в Пряшовѣ и Высоку школу педагогичну в Братиславѣ. Найперше учительовав в русинскых селах Легнава, Малый Липник, пак на школах в Пряшовѣ, де в року 1991 одышов до пензии.
Окремо треба повѣсти о мимошколской чинности Г. Бескида в популаризации русского языка и литературьі, в якой за понад двадцятьрочный период лишив значный слѣд нелем в Пряшовском краю, але в рамках цѣлой Словакии. Быв редактором двотомной публикации Декламаторам Пушкинового памятника, за котру быв оцѣненый Одбором школства окресного народного выбору в Пряшовѣ. На полѣ Меджинародной асоциации русистох быв оцѣненый честным узнаньом за заслугы о розвой словацкой русистикы (1986), достав подякованя од централного выбору Союзу чехословацко-совѣтского приятельства.за розвой мимошколской выукы русского языка, як и за роботу лектора в централных органах. Активно робив ай в иншых организациях в рамках тогдышнього мѣстского народного выбору в Пряшовѣ и в Народном фронтѣ Словакии.
По року 1989 року активно ся залучив до русинского руху, найперше як инициатор навернутя Русинам Руського дому в Пряшовѣ, котрый быв року 1965 незаконно зоштатненый. Нажаль, хоть тому пожертвовав рокы запаленой роботы, реализации того плана ся не дожив. Зберав документы о русинскых вызначных особностях, о вызначных историчных подѣях и публиковав на сторонах Народных новинок, часопису Русин, в русинскых календарях, новинках Інфо Русин и литературных алманахах, ай в заграничных русинскых выданях, як, напримѣр в часописѣ Бесіда, котрый выдавать Стоваришыня Лемків в Польщи, в часописѣ Вседержавный русинськый вістник у Мадярьску, в новинках Podkarpatská Rus, якы выходять на Чехах, и в далшых. Быв еден з 24 сполупрацовникох в Encyclopedia of Rusyn History and Culture, котру выдав професор Павел Роберт Магочий и професор Иван Поп , як и в украинском выданю з назвов Енциклопедія історії та культури карпатських русинів (р. 2010). Выдав двѣ свои книжкы: Николай Бескид на благо Русинів, 2005, и Николай Бескид як субєкт і обєкт історіоґрафії, 2009.
Жерела
Референции