Antímaco de Claros (en grego antigo: Ἀντίμαχος, en latín Antimachus) foi un poeta épico e elexíaco grego, fillo de Hiparco, segundo Cicerón.
Traxectoria
A miúdo chamábano o Colofonense porque Claros pertencía a Colofón. Floreceu durante o último período da Guerra do Peloponeso, arredor do século -V. A Suídas di que foi discípulo de Paníasis de Halicarnaso e de Estesímbroto, cousa que o faría pertencer a unha data anterior, pero que está emparentado con Lisandro e Platón especifica o período no que viviu, segundo Plutarco e Proclo.1.Antimachus en: William Smith (editor), A Dictionary of Greek and Roman Biography and Mythology. Vol. I. Boston: Little, Brown & Comp., 1867, p. 190-191.
Escribiu un poema épico titulado Tebaida (Θηβαίς), que relataba a expedición dos Sete contra Tebas e a guerra dos Epígonos, unha obra que se incluía no Ciclo Tebano. Outro dos seus poemas foi Lida, un poema de amor dedicado á súa amante ou esposa, que morreu moi nova. Antímaco regresou a Colofón buscando consolo por esa morte e escribiu este poema, que foi moi celebrado na antigüidade, segundo Ateneo de Náucratis. Era un poema moi longo, no que facía unha lista de todos os heroes míticos que, como o poeta, viran a morte prematura das súas amantes. Plutarco fala deste poema, que contiña unha gran cantidade de información procedente de mitos e historias e lendas antigas. Por este contido, e non polo seu valor poético, Agatárquides fixo un epítome, como se sabe por Focio.
Foi un dos precursores dos poetas da escola de Alexandría, que escribían para a elite culta en lugar de para o público en xeral. O emperador Hadriano prefería as súas obras ás de Homero, segundo Dión Casio. Atribúenselle outras obras, como unha Artemisa, unha segunda chamada Delta e outra titulada Iacine (Ἰαχίνη), e quizais unha Centauromaquia, pero en todos estes casos menciónase un Antímaco sen ningún epíteto descritivo, e sábese que polo menos outros dous Antímacos foron escritores. A Suídas di que Antímaco de Claros tamén foi gramático, e parece que preparou unha edición crítica das obras de Homero.
Notas
Categoría:Personalidades de Colofón na Antigüidade